هەککردنی ١٢٧,٤٢٦ بیتکۆین لە کۆگای کانزاکانی لوبیان
کۆمپانیای شیکاری بلۆکچەین ئارخام (Arkham) لە راپۆرتێکی سەرسووڕهێنەردا ئاشکرای کرد کە گەورەترین دزی بیتکۆین لە مێژووی دراوە دیجیتاڵییەکان، کە لە ساڵی ٢٠٢٠ لە کۆگای کانزاکانی لوبیان (LuBian)ی چینی روویدابوو، دوای چەندین ساڵ شاراوەیی ئێستا ئاشکرا بووە. ئەم دزییە بریتییە لە ١٢٧,٤٢٦ بیتکۆین کە لە کاتی روودانەکەدا نرخی دەوروبەری ٣.٥ ملیار دۆلار بووە و ئێستا بە نرخەکانی ئێستا (تا ئابی ٢٠٢٥)، ئەم بڕە زیاتر لە ١٤.٥ ملیار دۆلارە. ئەم رووداوە نەک تەنها بەهۆی قەبارەی گەورەی سامانە دزراوەکان، بەڵکو بەهۆی شاراوەییەتی بۆ ماوەی زیاتر لە چوار ساڵ، سەرنجی کۆمەڵگەی دراوە دیجیتاڵییەکانی راکێشاوە.
وردەکارییەکانی هەککردنەکە: دزییەکی بێدەنگ
بەپێی داتای ئانچەینی ئارخام، ئەم دزییە لە ٢٨ی کانوونی یەکەمی ٢٠٢٠ دەستیپێکردووە. هەکەرەکان یان هەکەرێک توانیویەتی لە ماوەیەکی کورتدا زیاتر لە ٩٠٪ لە بیتکۆینەکانی کۆگای لوبیان بکەنەوە. تەنها رۆژێک دوای دەستپێکی هێرشەکە، ٦ ملیۆن دۆلاری دیکە لە بیتکۆینەکانیش دزراون. شتێکی سەرنجڕاکێش ئەوەیە کە هیچ راگەیەندنێکی فەرمی لەلایەن لوبیان یان هەکەرەوە لەسەر ئەم دزییە بڵاونەکراوەتەوە و ئەمە تا کاتی ئاشکراکردنی ئارخام بە تەواوی شاراوە بووە.
لوبیان، کە لە ساڵی ٢٠٢٠ یەکێک لە گەورەترین کۆگاکانی کانزاکانی بیتکۆین بوو لە جیهاندا و نزیکەی ٦٪ لە رێژەی هەش (Hash Rate)ی تۆڕی بیتکۆین لە ژێر کۆنترۆڵیدا بوو، دوای ئەم دزییە هەوڵیداوە بە بەکارهێنانی تایبەتمەندی OP_RETURNی بلۆکچەینی بیتکۆین پەیوەندی لەگەڵ هەکەرەکە بکات. ئەم تایبەتمەندییە رێگە بە بەکارهێنەران دەدات پەیامە کورتەکان لە تراکانشەکانی بیتکۆین جێگیر بکەن. لوبیان کۆی ١.٤ بیتکۆین لە ١,٥١٦ پەیامدا ناردووە بۆ هەکەرەکە و داوای کردووە کە سامانە دزراوەکان بگەڕێنێتەوە، تەنانەت خەڵاتێکیشی پێشکەش کردووە. بەڵام هیچ نیشانەیەک لە وەڵامدانەوەی هەکەر یان گەڕاندنەوەی پارەکان نەبووە.
هۆکارە تەکنیکییەکانی هەککردنەکە: لاوازی لە کلیلە تایبەتییەکان
لێکۆڵینەوەکانی ئارخام ئەوەی دەرخستووە کە هۆکاری سەرەکی ئەم دزییە پەیوەستە بە لاوازی لە ئەلگۆریتمەکانی درووستکردنی کلیلە تایبەتییەکانی لوبیان. بەپێی شیکەرەکان، ئەم کۆگای کانزاکانە کۆدەکانی ئەمنی پارێزراوەی بەکارهێناوە کە لەسەر بنەمای ٣٢ بیت ئەنترۆپی بوون. ئەم ئاستە لە ئەنترۆپی بۆ درووستکردنی کلیلە تایبەتییەکان زۆر لاوازە لە بەرامبەر هێرشەکانی brute-force (هەوڵدان بۆ گەسپاندنی کلیلیەکان بە تاقیکردنەوە و هەڵە). راپۆرتەکان ئاماژە بەوە دەکەن کە کۆدەکانی بەکارهێنراو لە لوبیان هاوشێوەی کۆدەکانی جزدانی تراست ولت (Trust Wallet) بوون کە لە رابردوودا هەر هەمان جۆرە هێرشەکانیان بەرپاکراوە. ئەم لاوازییە ئەمنییە رێگەی داوە بە هەکەر کە دەستبکەوێت بە جزدانە دیجیتاڵییەکانی لوبیان و سامانەکان بگوازێتەوە بۆ سەدان جزدانی دیکە.
ئەنجامەکانی هەککردنەکە: هەکەر لە نێو گەورەترین خاوەنەکانی بیتکۆین
سەرەڕای ئەم دزییە گەورەیە، لوبیان توانیویەتی ١١,٨٨٦ بیتکۆین (بە نرخی نزیکەی ١.٣٥ ملیار دۆلار لە ئێستادا) بپارێزێت. بەڵام بەشە زۆری سامانە دزراوەکان، هەکەرەکە کردووە بە یەکێک لە گەورەترین خاوەنەکانی بیتکۆین لە جیهاندا. بەپێی داتاکانی ئارخام، ئەم هەکەرە ئێستا لە پلەی سیانزەهەمی گەورەترین خاوەنەکانی بیتکۆینە و تەنانەت لە هەکەری ناوداری بۆرسەی Mt.Gox، کە یەکێک لە گەورەترین دزییەکانی مێژووی دراوە دیجیتاڵییەکانی ئەنجامدابوو، پێش کەوتووە.
پێش ئەم ئاشکراکردنە، دزی لە بۆرسەی Bybit بە نرخی زیاتر لە ١.٤ ملیار دۆلار لە ئیثیریۆم (ETH) وەک گەورەترین دزی دراوە دیجیتاڵییەکان ناسرابوو. بەڵام هەککردنی لوبیان بە نرخی ١٤.٥ ملیار دۆلار، ئەم ریکۆردە شکاندووە و بووە بە گەورەترین دزی مێژووی دراوە دیجیتاڵییەکان.
وەڵامەکانی کۆمەڵگەی کریپتۆ و وانەکان بۆ داهاتوو
ئاشکراکردنی ئەم دزییە شۆکێکی گەورەی بە کۆمەڵگەی دراوە دیجیتاڵییەکان گەیاندووە. شاراوەیی ئەم دزییە گەورەیە بۆ ماوەی زیاتر لە چوار ساڵ، پرسیارەکانی لەسەر شەفافیەت و ئەمنی لە پیشەسازی دراوە دیجیتاڵییەکان هێنایە ئاراوە. لوبیان، کە لە ساڵی ٢٠٢٠ لە چین و ئێران چالاکی دەکرد، یەکێک لە یاریزانە سەرەکییەکانی تۆڕی کانزاکانی بیتکۆین بوو. ئەم رووداوە نیشانی داوە کە لاوازییەکان لە ژێرخانە ئەمنییەکاندا تەنانەت لە دامەزراوە گەورە و باوەڕپێکراوەکاندا هەن.
پسپۆڕان پێیان وایە کە ئەم دزییە وانەی گرنگی بۆ چالاکوانانی پیشەسازی دراوە دیجیتاڵییەکان هەیە. بەکارهێنانی ئەلگۆریتمەکانی ئەمنی زیاتر بۆ درووستکردنی کلیلە تایبەتییەکان، زیادکردنی شەفافیەت لە راپۆرتکردنی دزییەکان و باشترکردنی پرۆتۆکۆڵەکانی ئەمنی جزدانەکان، هەندێک لەو هەنگاوانەن کە دەتوانن رێگری لە دووبارەبوونەوەی ئەم جۆرە رووداوەکان بکەن. هەروەها، ئەم رووداوە جارێکی دیکە گرنگی کۆمپانیاکانی شیکاری بلۆکچەین وەک ئارخام لە راوەدوونی و ئاشکراکردنی چالاکییە نایاساییەکان لە تۆڕەکانی بلۆکچەین نیشاندا.
داهاتووی لوبیان و بیتکۆینە دزراوەکان
لە ئێستادا، نادیارە کە ئایا لوبیان یان دەسەڵاتە یاساییەکان دەتوانن هەکەرەکە بدۆزنەوە و سامانە دزراوەکان بگەڕێننەوە یان نا. داتاکانی ئانچەینی ئارخام نیشاندەدەن کە بیتکۆینە دزراوەکان بۆ سەدان جزدانی جیاواز گواستراونەتەوە، کە ئەمە راوەدوون و گەڕاندنەوەیان قورستر دەکات. سەرەڕای ئەوە، شەفافیەتی سروشتی بلۆکچەینی بیتکۆین ئەمە دەکات کە هەموو تراکانشەکان بەردەست بن بۆ چاودێریکردن، و ئەمە دەتوانێت هیوایەک بۆ ناسینەوەی هەکەر لە داهاتوودا دروست بکات.
ئەم دزییە جارێکی دیکە نیشانی دا کە ئەمنی لە جیهانی دراوە دیجیتاڵییەکاندا هێشتا یەکێک لە گەورەترین ئاستەنگەکانی ئەم پیشەسازییەیە. لە کاتێکدا کە بیتکۆین وەک سامانێکی نامەرکەزی و ئەمن ناسراوە، لاوازییە مرۆیی و تەکنیکییەکان دەتوانن ببنە هۆی زیانە گەورەکان.